Compostela, 19 de outubro do 2018 – O secretario xeral de Política Lingüística, Valentín García, participou no salón de graos da Facultade de Dereito compostelá, na rolda de prensa en que se deu a coñecer o novo vocabulario Termos esenciais do dereito do traballo e da seguridade social, elaborado polo Servizo de Normalización Lingüística da Universidade de Santiago (USC) co apoio da Consellería de Cultura e Turismo.
García Gómez incidiu, durante a súa intervención, na “importancia do traballo terminolóxico para manter actualizada o vocabulario dunha lingua e favorecer que os falantes a empreguen nos máis diversos ámbitos, dotándoa deste xeito da vida que só pode dar o uso frecuente e variado e do prestixio que lle confire o ser empregada en campos coma o do dereito, que hoxe nos convoca aquí”.
O secretario xeral estivo acompañado por Gumersindo Feijoo Costa, vicerreitor de Planificación e Proxección Estratéxica da USC; Gumersindo Guinarte Cabada, decano da Facultade de Dereito da mesma universidade, e a profesora Alicia Villalba Sánchez, coautora do glosario xunto con Xusto A. Rodríguez Río.
Máis de 1000 conceptos
Termos esenciais de dereito do traballo e da seguridade social é un glosario trilingüe (galego-español-inglés) que recolle máis de 1000 conceptos dos ámbitos indicados no seu título. Esta publicación completa a colección de vocabularios básicos de dereito elaborados polo Servizo de Normalización Lingüística da USC, na que se incluíron propostas terminolóxicas de dereito constitucional, penal, internacional, civil, administrativo e mercantil.
Colaboración para a normalización lingüística
A elaboración e publicación deste traballo foi froito da colaboración entre a Universidade compostelá e a Secretaría Xeral de Política Lingüística da Consellería de Cultura e Turismo, que ten asinado con ela un convenio de colaboración en materia de normalización da Lingua Galega. O dito convenio posibilita tamén a celebración de diversos cursos de formación, o apoio á redacción e defensa en galego de teses, traballos de fin de grao e de fin de mestrado ou o subtitulado de vídeos TED do ámbito da saúde, entre outras accións.
