Compostela, 25 de febreiro do 2018 – A USC e a Sociedade Deportiva Compostela asinaron este mércores un acordo de colaboración polo que, entre outros asuntos, a institución educativa convocará cinco bolsas para que deportistas da sociedade poidan cursar estudos de grao en Santiago.
Ademais, en virtude do convenio o Compostela colaborará na realización dun campus de fútbol para nenos e nenas de entre 9 e 16 anos a celebrar en xuño de 2018 nas instalacións da USC e que terá continuidade o vindeiro ano. Os campus, dunha duración dunha semana, impartiranos técnicos do club deportivo.
Na sinatura do acordo, dunha vixencia de dous anos prorrogable, participaron o reitor da USC, Juan Viaño, e o presidente da SDC, Antonio Quinteiro Canedo, que estiveron acompañados pola vicerreitora de Estudantes, Cultura e Responsabilidade Social, Dolores Álvarez, e polo responsable de Relacións Externas da sociedade, Ramón Castro.
