A Estrada, 14 de maio do 2019 – A Asociación Cultural Vagalumes quere lembrar a figura de Antonio Fraguas, con motivo do día das letras galegas, e pola enorme vinculación co pobo da Estrada.
Fraguas foi profesor no concello e desde Vagalumes explican que “temos unha enorme débeda con el que transcende a súa obra e que ten que ver coa súa presenza no noso concello en anos decisivos e que deixou unha profunda pegada no seu alumnado”.
Programación
A primeira das actividades programadas será ese mesmo xoves as oito e medida da tarde coa proxección do documental “A derradeira lección do mestre” que trata sobre a historia do ensino na Estrada, prestando tamén atención ao seu labor como profesor do Instituto e as consecuencias que para el tivo o seu compromiso político co nacionalismo galego. Esta proxección levarase a cabo nos Minicines Central. A entrada será libre e gratuíta por xenerosidade da empresa e a asociación quere mostrar o seu agradecemento.
O mesmo Día das Letras Galegas, este venres 17, organizan un roteiro seguindo os pasos de Fraguas. A partir das 5 da tarde desde a mámoa do Arnado, seguindo pola “carreteira da pistola”, ponte de Leira até o Castro de Ribela que no seu día fora escavado, xunto cos seus alumnos, por Antonio Fraguas. O roteiro ten menos de catro quilómetros pero servirá para lembrar as actividades e o contexto da presenza de Antonio Fraguas no concello.
Ese mesmo días as oito e media da tarde no MOME presentarase o especial do Sermos Galiza dedicado a Antonio Fraguas a cargo do seu coordinador, o profesor Manuel Vilar, secretario do Museo do Pobo Galego. Prestarase atención á pegada de Fraguas no concello e servirá para pechar as actividades de Vagalumes.
