Bisbarra, 27 de novembro do 2017 – O portavoz do Partido Popular na Deputación da Coruña, Agustín Hernández, demandou ao goberno provincial que instale unha varanda de protección na DP-7804, entre Santiago e Val do Dubra, ao seu paso pola Ponte Albar, para evitar o perigo que supón o pronunciado desnivel que separa esta estrada do leito do río Tambre.
Desde o grupo popular lembran que, recentemente, o executivo provincial levou a cabo un proxecto para mellorar o firme no tramo máis próximo á Ponte Albar, no límite co Concello de Trazo. Esta actuación permitiu mellorar as condicións de seguridade nun dos tramos máis perigosos desta vía.
Con todo, e tal como expuxo Hernández, a mellora sería completa si, ademais, a Deputación da Coruña procedese á colocación desta varanda de protección para, desta forma, evitar, na medida do posible e en caso de accidente a caía dun vehículo ao río Tambre.
“Estamos a falar dunha actuación que non sería excesivamente cara, pero si é moi necesaria”, explicou o portavoz popular, quen incidiu en que a existencia de árbores nesta zona sombría incrementa a posibilidade de que se produza calquera accidente.