Ao longo de toda a fin de semana as bandas participaron na competición no Auditorio de Galicia. Os concertos foron retransmitidos vía streaming.
Santiago de Compostela, 28 de novembro do 2016 – Ao longo da fin de semana celebrouse no Auditorio de Galicia o X Certame de Bandas. As Bandas de música participaron interpretando pezas obrigatorias e outras de libre elección. A competición divídese por número de compoñentes sendo a sección terceira a de ata 50 músicos, a segunda de 51 a 70 compoñentes e a primeira a de máis de 70. O evento foi organizado pola Federación Galega de Bandas de Música Popular (FGBMP), co apoio económico da Consellería de Cultura, Educación e Ordenación Universitaria, a través de AGADIC, e a colaboración do Concello de Santiago de Compostela e a CRTVG no Auditorio de Galicia.
Seccións primeira e segunda
A Unión Musical de Meaño proclamouse gañadora da sección primeira (bandas de máis de 70 músicos) do X Certame Galego de Bandas de Música. Mentres que a Banda da Escola de Música de Rianxo impúxose na sección segunda (bandas de 51 a 70 compoñentes). A Unión Musical, dirixida por Diego Javier Lorente López venceu na sección primeira. O segundo posto foi para a Banda de Música Cultural de Teo, e o terceiro para a Banda “Sons e Soños” de Rábade-Begonte-Outeiro.
Pola súa banda, a Banda da Escola de Música de Rianxo, baixo a batuta de Rafael Collazo Moares, resultou gañadora na sección segunda, por diante da Banda de Música de Catoira, que rematou en segunda posición, da Banda de Música de Sanxenxo, terceira, e da Banda de Música “Belas Artes” de Cangas, que ficou fóra do podio. Na sección primeira, a gañadora será recompensada con 2000 €, a segunda recibirá 1200 € e a terceira 700€. Mentres que na sección segunda os premios ascenden a 1800 € para a banda vencedora, 1100 € para a segunda e 600 € para a terceira.
O xurado internacional composto por Laurence Roman, Pilar Jurado e Paulino Pereiro, emitiu os seus veredictos tras valorar afinación, planos sonoros, calidade sonora, técnica, dinámicas, articulación, musicalidade e interpretación xeral da obra, de cada unha das bandas participantes. As 7 bandas interpretaron un pasodobre (non competitivo), unha obra libre e unha obra de carácter obrigatorio: ‘Sinfonietta das Cantigas’ de José Ignacio Blesa lull para as da sección primeira, e ‘As Lúas’ de Juan Pérez Berná para as da segunda. A obra libre defendida pola Unión Musical de Meaño foi ‘Music of the Spheres’, de Philip Sparke, e o pasodobre ‘Brisas del Tea’, de Iñaki Lecumberri. Mentres que a Banda da Escola de Música de Rianxo optou pola ‘Sinfonía nº2 “La passió de Crist”’ de Ferrer Ferrán, e o pasodobre ‘Faustino Rozalén’, de Xosé Carlos Seráns.
Sección terceira
A Lira de Ribadavia, dirixida por Xavier Oliveira venceu na sección terceira en segundo lugar quedou a Unión Musical de Cabral, e completou o podio a Banda de Música de Salvaterra. As outras bandas que deleitaron ao numeroso público asistente foron a Banda de Música de Antas de Ulla (premio á mellor interpretación de temática galega), a Agrupación Musical de Belesar, a Banda de Música de Visantoña, a Banda de Música Popular de Moaña “Airiños do Morrazo” e a Agrupación Músico-Cultural de Ribadumia. O primeiro premio está dotado con 1200 €, o segundo con 800 € e o terceiro con 500 €.
O xurado internacional composto por Paulino Perreiro, Laurence Roman e Pilar Jurado, anunciou o seu veredicto tras valorar afinación, sonoridade, interpretación e técnica de cada unha das bandas participantes. As oito bandas interpretaron un pasodobre, unha obra libre e unha obra de carácter obrigatorio, Olimpo dos Celtas, de Santiago Barreira Davila. A obra libre defendida pola Lira de Ribadavia foi El camino real de Alfreed Reed, e o pasodobre, Soñar en Xirimbao, de Ángel Luis Fernández.
Acto de clausura
Ao rematar o Certame fíxose entrega dos premios ás bandas galardoadas. Durante este acto estiveron presentes o presidente da FGBMP, Armando Morales, o concelleiro de Educación de Santiago de Compostela, Manuel Dios, e o conselleiro de Cultura, Educación e Ordenación Universitaria da Xunta de Galicia, Román Rodríguez, o secretario xeral de Política Lingüística, Valentín García, o Director da Axencia Galega de Industrias Culturais (AGADIC), Jacobo Sutil, e máis o director da SGAE en Galicia Juan Carlos Fernández Fasero. O presidente da FGBMP fixo fincapé no esforzo e os sacrificios que realizan os músicos que forman parte das bandas. Manuel Dios destacou o papel que xogan a familia e a escola na formación de novos músicos. Mentres que Román Rodríguez salientou a labor dos concellos galegos.
Dende a FGBMP retransmitíronse as dúas xornadas de competición vía streaming e a través das redes sociais, nas que centos de cidadáns compartiron o seu amor pola música galega. Péchase así un Certame que por décimo ano consecutivo achegou a música á cidadanía e renovou o seu compromiso coa cultura galega e coa formación de novos músicos.