Ames, 13 de xunho do 2019 – A Concellaría de Deportes de Ames organiza este sábado unha xornada de iniciación ao piragüismo que se desenvolverá na praia fluvial de Tapia entre as 11:00 e as 13:30 horas.
Mediante esta actividade búscase que os participantes que o desexen poidan aprender a dominar unha embarcación para a práctica do piragüismo . A xornada consistirá nunha sesión de portas abertas á que poderán asistir todas aquelas persoas maiores de 7 anos interesadas, sempre e cando saiban nadar. Para participar nesta actividade gratuíta, que non require inscrición previa, hai que levar traxe de baño, unha camiseta e chancletas.
Durante a mañá, os e as participantes aprenderán a subirse a unha piragua, a manter o equilibrio e a manexar as palas para que a embarcación se desprace correctamente. O Concello de Ames conta coa colaboración do Club Piragüismo Ribeiras do Tambre, que se encarga de impartir esta actividade, e da Deputación da Coruña.