Ames, 6 de agosto do 2018 – O próximo sábado 11 de agosto Ames organiza a trixésimo terceira edición do Descenso do Tambre en Piragua, que partirá coma sempre de Portomouro para chegar a praia de Tapia.
O Descenso do Tambre é organizado cada ano polo Club de Piragüismo Ribeiras do Tambre que conta coa colaboración do concello de Ames e a Federación Galega de Piragüismo. A baixada comezará as doce e media en Portomouro, no concello de Val do Dubra, e chegará a praia de Tapia, xa en Ames, cubrindo unha distancia de 5.400 metros. No proba participarán padexeiros correspondentes ás categorías kaiak home (veterano, sénior, xuvenil e cadete), kaiak muller (sénior, xuvenil e cadete) e canoa home (sénior, xuvenil e cadete).
Xa pola tarde a partir das catro, nun circuíto dun kilómetro e medio delimitado na praia de Tapia, disputarase a segunda parte do trofeo. En este caso poderán participar rapaces das categorías benxamín, alevín e infantil con embarcacións K-1 e C-1.
A entrega de premios do descenso está prevista para as dúas da tarde e a correspondente ao circuíto para as oito. Haberá trofeos para os deportistas das tres primeiras embarcacións de cada modalidade e categoría. Tamén se entregarán trofeos aos tres primeiros clubs clasificados. A proba está aberta a todos os clubs de piragüismo e seccións de piragüismo de entidades deportivas de toda España. A xornada rematará despois dos pinchos, que se ofrecerán aos participantes e os seus acompañantes.
Normativa
Para poder competir, os padexeiros deberán estar en posesión da licenza federativa debidamente actualizada para a tempada 2018 e será de uso obrigatorio o chaleco salvavidas para todos os participantes. Cada club poderá inscribir en cada proba o número de embarcacións e padexeiros que consideren, sen límites. As inscricións poderán realizarse mediante a aplicación web da Federación Galega de Piragüismo até este martes 7 de agosto.
A recollida de dorsais para o descenso realizarase entre as 11.00 e as 12.00 horas nas instalacións da praia fluvial, mentres que a recollida para o circuíto producirase entre as 14.30 e as 15.30 horas. Para máis información pódense poñer en contacto co Club de Piragüismo Ribeiras do Tambre chamando aos número se teléfono 625 398 575 ou enviando un correo electrónico ao enderezo deportes@concellodeames.gal. Outra opción é poñerse en contacto coa Federación Galega de Piragüismo a través do número de teléfono 986 84 21 06 ou no enderezo electrónico kayak-canoa@fegapi.org.