Compostela, 21 de marzo do 2019 – A Casa das Crechas acolle, as nove da noite e a un prezo de 5€, o espectáculo dirixido e interpretado por Zakarías O’Facas “Maldita Peaxe”.
Maldita Peaxe é un espectáculo que se move entre os xéneros do teatro e do monólogo cómico, aderezado por unha ecléctica escolma musical. O texto interpretado é unha adaptación da novela curta Peaxes, do escritor vigués Santiago Lopo, e publicada por Edicións Xerais de Galicia na súa colección de Narrativa. O espectáculo fai uso do poético e do cómico, do dramático e do irónico, do tráxico e do sarcástico, na procura da comunicación directa co público. A duración da obra é de 75 minutos, máis un intermedio de 10 – 15 minutos.
O protagonista da obra desenvolve o seu traballo no interior dunha cabina na peaxe da autoestrada. Dende esta claustrofóbica posición de privilexio, observa atentamente aos condutores habituais na súa ruta. A rutina faino refuxiarse na súa propia imaxinación, visualizando as vidas dos que pasan fronte ao seu posto. E axiña atopa o seu propio xeito de rachar co fastío do traballo: a escritura dun diario, onde retrata aos condutores e as súas vidas, observadas, intuídas, e imaxinadas. Preséntanos así unha serie de existencias humanas reconstruídas a partir de fragmentos de conversas, obxectos transportados nos vehículos, e dos ritmos e melodías que acompañan as viaxes das personaxes. Mais ao cabo do tempo, será inevitábel que comece a interaccionar con elas…
Zakarías O’Facas, actor e contacontos vigués, formouse como actor na escola de teatro Santart (Santiago de Compostela), e na Asociación “A Artística”(Vigo) onde estudou improvisación e técnicas vocais con Cristina Domínguez. Formouse coma contacontos en cursos impartidos por Candido Pazó e Charo Pita. Na súa experiencia profesional inclúense actuacións cas compañías Teatro do Noroeste, Teatro Santart, o grupo Migallas, a Aula de Teatro de Pontevedra, o grupo cómico 4 x 4, e o grupo narrativo-musical 4 ghatos. Coma contador posúe unha ampla e variada experiencia en bares, teatros, festas, escolas, e despedidas de solteira.
