Veciños de aldeas de Ames denuncian a desconexión do transporte

0

Ames, 23 de decembro do 2020 – Os cambios no transporte metropolitano que entraron en vigor este mércores deixan sen conexión con Santiago a varios lugares de Ames.

Numerosas aldeas de Ames das parroquias de Biduído, Bugallido e Ortoño, quedan sen conexión coa modificación da liña urbana P2 que agora remata no Casal.

A única opción que queda para moitos veciños é a liña Extramundi – Estación de Autobuses que non segue o mesmo percorrido polo que non chega as mesmas aldeas. Esta opción tampouco ten, según explican os veciños, frecuencias suficientes e tampouco pasa polo centro, o cal dificulta por exemplo acudir a traballar ao casco histórico de Compostela ou mercar na praza de abastos, algo que facían a miudo moitas persoas maiores.

Maiores frecuencias con Bertamiráns e Milladoiro

As maiores frecuencias interiores, con Bertamiráns e Milladoiro, son ben recibidas pola veciñanza pero consideran que deben ser complementarias “Está ben que nos comuniquen con máis frecuencia con Bertamiráns e o Milladoiro pero sempre é preciso desprazarse a Santiago para facer compras ou xestións, e hai persoas que o fan a diario para ir á universidade, ao instituto ou ao seu traballo”.

Os veciños engaden que as opcións que lles quedan son usar o taxi, mercar coche ou “percorrer desde o Casal estradas moi inseguras, sen beirarrúa, de noite e faga bo tempo ou chova a cachón. Ademais de que os usuarios de máis idades non teñen sequera esas alternativas”.

Falta de información

Tamén se queixan da nula información por parte do concello de Ames e ter que sabelo nas últimas horas e case de casualidade “Estamos seguros de que hoxe moita xente maior ha estar hoxe nas paradas baixo a chuvia, en Ortoño, en Buceleiras e noutras paradas preguntándose por qué non aparece o autobús, iso é indignante”.

O concello nunha nota de prensa indicaba que ” Nos vindeiros días desde a alcaldía convocarase unha xuntanza coas asociacións de veciños e veciñas de Ortoño, Bugallido e Biduído, xa que son os lugares polas que pasaba esta liña que agora quedou sen servizo (Ortoño, O Santo, Ortoñiño, Guimaráns, Outeiro, Quistiláns, Framil, Costoia, Fraíz e Casaliño) e que leva máis de catro décadas prestando servizo a estas parroquias. O obxectivo é realizar un traballo conxunto entre a veciñanza e a Administración local para conseguir o restablecemento e mellora do servizo de transporte”.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial