Solicitan unha consulta popular sobre a xestión da auga en Compostela

0

Compostela, 24 de febreiro do 2021 – Compostela Aberta pedirá que se realice unha consulta popular sobre o modelo de xetión da auga na cidade.

A consulta sobre o ciclo da auga en Compostela realizaríase seguindo os procedementos da Lei de Bases de Réxime Local, a Lei de Administración Local de Galicia, e o regulamento municipal de Participación Cidadá.

Marta Lois

A portavoz municipal de CA, Marta Lois, explicou en rolda de prensa que “Bugallo debe escoitar a opinión da veciñanza antes de executar a decisión que parece ter tomada, e que hipotecaría o servizo nos próximos 25 anos”.

A petición que levará a pleno Compostela Aberta comeza polo traslado da iniciativa a comisión da auga, xa creada. Esta comisión consensuaría a proposta e a pregunta que se faría na consulta. Finalmente o acordo sería sometido a exposición pública cun prazo para alegacións.

Consulta popular

CA lembra que “o noso ordenamento xurídico recoñécelles ás alcaldías a potestade de someter a consulta popular asuntos de competencia propia municipal e de carácter local que sexan de especial relevancia para os intereses da veciñanza”. Para Marta Lois, “é evidente que o modelo de xestión da auga cumpre esas premisas”.

A consulta popular está regulada no artigo 71 da Lei de Bases de Réxime Local; e a Lei de Administración Local de Galicia, no seu artigo 257, contén unha regulación propia galega para este tipo de consultas, segundo a cal o alcalde pode impulsar a consulta popular despois do acordo do Pleno por maioría absoluta. A Corporación Local deberá remitirlle á Xunta unha copia literal do acordo adoptado polo Pleno do Concello, precisando os termos exactos da consulta, o Consello da Xunta enviará a solicitude ao Goberno do Estado, e será este quen autorice a consulta, que despois será convocada mediante un decreto do Consello da Xunta. Por último, tamén o Regulamento Municipal de Participación Cidadá, no seu título sexto, establece o marco normativo local da consulta popular, que non tería carácter vinculante.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial