Denuncian a masificación dos vestiarios do CHUS

0

Compostela, 18 de novembro do 2020 – Cig Saúde de Compostela denuncia que se incumpre a Guía para prevención de riscos con axentes biolóxicos nos uniformes pola masificación dos vestiarios do Complexo Hospitalario Universitario de Santiago, o CHUS.

O sindicato explica que os traballadores non teñen vestiarios insuficientes, faltan taquillas, tanto para persoal eventual como fixo, faltan dispensadores de papel secamáns, toallas, perchas, o aforo excesivo impide manter as distancias de seguridade, e na zona de duchas hai colas para facer uso delas ou a auga é imposible de regular. Estas son algunhas das cuestións que se salientan na denuncia que a CIG-Saúde Compostela presentou perante a Inspección de Traballo.

A terceira denuncia

Cig destaca que non é a primeira denuncia xa que no último mes presentáronse xa dúas máis “pola incapacidade da Xerencia de dar respostas e adecuación de espazos, non agora senón dende o comezo da pandemia”.

No escrito rexistrado sinálanse cuestións como a imposibilidade de manter as distancias de seguridade polo exceso de armarios acumulados nos espazos dos vestiarios, que incumpren “claramente” o protocolo de PRL do Ministerio, onde consta que debe manterse unha distancia de seguridade entre traballadoras/es de 1,5 metros e que os aforos dos locais deben establecerse respectando as medidas de seguridade.

Isto, segundo o sindicato, ten provocado queixas constantes do persoal que se ve abocado a agardar para facer uso dos vestiarios ou, como no caso do de Urxencias, a utilizar un edificio anexo e non pertencente ao ámbito hospitalario para poder lavarse ao rematar a xornada en zona covid.

A denuncia recolle os numerosos escritos dirixidos tanto ao comité de Seguridade e Saúde, como á Xerencia da Área Sanitaria de Santiago e Barbanza por estas cuestións sen que, até a data se fixera absolutamente nada.

Deficiencias que afectan tamén a uniformes e lencería

Na denuncia tamén se recollen os escritos presentados en relación cos uniformes e a lencería. A Covid puxo en evidencia non só a importancia de contar con EPIs, senón tamén a importancia de que os uniformes estean deseñados para evitar contaxios. Por iso o persoal solicitou novos modelos de uniformes abertos pola parte dianteira a modo de chaqueta e que se puidera pechar con corchetes.

O modelo actual, de casaca “non é garantista na prevención de riscos relacionados con axentes biolóxicos, ao ter que sacarse pola cabeza arrastrando a contaminación pola cara e o pelo”, sinalan.

Un problema ao que engaden deficiencias no circuíto de lavado, ao non prover en tempo e cantidade suficiente a uniformidade; uniformes que se extravían ou deterioran ou falta de organización e instrucións de cómo recoller e desbotar para contaminar o menos posible. A este respecto, a administración quedou pendente de presentar un proxecto, para o que aínda están esperando.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial