Polémica sobre a liña de bus de Ortoño, en Ames, sen unha solución para os veciños

0

Ames, 21 de xaneiro do 2021 – A desaparición da liña de bus que daba servizo as parroquias de Bugallido, Biduido e Ortoño en Ames segue sen ter solución mentres os políticos se pasan a pelota uns aos outros.

A Xunta emprazou a Ames a buscar acordos con Santiago. Santiago está disposto a repoñer a liña se non a ten que pagar. Agora o concello de Ames solicitará a Xunta que estableza unha liña directa con Santiago co que o debate volve ao punto inicial sin que se vexa unha solución a curto ou medio prazo.

Antecedentes

Desde o Concello de Ames infórmase que a liña, no ano 2017, tivo un anteproxecto para ser licitada por parte da Xunta de Galicia. Tras as alegacións presentadas polo Concello de Santiago, opoñéndose a dita licitación, a Xunta decidiu non proceder a súa aprobación aínda que no texto da resolución tampouco considerou procedentes as alegacións de Compostela.

As alegacións realizadas polo Concello de Ames para a mellora do traxecto nunca foron contestadas e o servizo seguiuse prestando coa liña P2 de transporte urbano de Santiago de Compostela ata o pasado mes de decembro.

Reunión cos veciños

O goberno municipal de Ames mantivo reunións coa Dirección Xeral de Mobilidade e co concello de Santiago. Tras eses encontros reuniuse este mércores cos veciños de Bugallido, Biduido e Ortoño para explicar a situación.  De esta xuntanza saíu o acordo  de presentar unha moción para a reactivación da liña de transporte e que buscará o consenso de toda a Corporación municipal e solicitarlle á Xunta de Galicia, como Administración competente do transporte público, a instauración dunha liña directa con Santiago.

O rexedor municipal explica que “non ten sentido que se nos obrigue a asumir o transporte de Ortoño, Bugallido e Biduído porque a Xunta non tivese contemplado dito contrato na nova licitación que acaba de aprobar e poñer en marcha. O Concello non vai a asumir máis competencias impropias e que supoñan preto de 80.000 euros ao ano”.

“Censura” ao PP

Por outra banda o pasado sábado o Partido Popular anunciaba en nota de prensa  que levaría ao seguinte pleno unha moción para debater este problema. Os populares propoñían a firma dun convenio entre Santiago e Ames coa participación da Consellería de Infraestruturas e Mobilidade. Eles consideran que o concello podería costear a liña, eses 80.000 euros, por ter un Remanente de Tesouraría de 8.313.233,75 €, según o informe de Intervención e Secretaría de 5 de outubro pasado e no que consta tamén un superavit de 1.274.543,70€.

Despois da decisión do goberno municipal de levar a súa propia moción ao pleno o PP denuncia que a súa foi “censurada”. A proposta, din, foi “presentada en tempo e forma, pasou pola Xunta de Voceiros e de ser aprobada na sesión plenaria do vindeiro xoves 28 daría luz verde á restitución da liña P2 entre Santiago e Ortoño e vía libre para buscar melloras tanto no trazado como nas paradas”.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial