Máscaras contra a Violencia machista

0

Compostela, 13 de novembro do 2020 – Volve a campaña Compostela en Negro contra a Violencia que este ano repartirá 4.500 máscaras con lemas nas farmacias da cidade.

A concelleira de Políticas de Igualdade, Mercedes Rosón, foi a encargada de presentar a campaña acompañada da deseñadora, Uqui Permuy, e da coordinadora da mesma no rural, Cruz Dafonte. Esta acción enmárcase nas previstas para conmemorar o 25 de novembro “Día Internacional da Eliminación da Violencia contra a Muller”.

Mercedes Rosón dixo que “nun ano triste, gris, marcado polas consecuencias sanitarias e socioeconómicas dunha terrible pandemia que afecta a todo o planeta, as mulleres seguen a ser as máis afectadas porque a Covid-19 está sementando, se cabe, máis desigualdade, o que nos obriga a intervir e ser máis proactivas que nunca”.

En colaboración co Colexio de Farmacéuticos da Coruña, levarase a cabo o reparto de aproximadamente 4.500 máscaras, por parte das farmacias de Santiago, do 23 ao 25 de novembro, con logotipos como “Compostela en negro Contra as Violencias”, ou “Loito contra o machismo”. Tamén se distribuirán outras mil entre colectivos de mulleres e colectivos LGTBI.

En Negro dende a Casa

#EnNegroDendeACasa. É o cancelo dun traballo de sensibilización no que colabora o Colexio de Psicoloxía de Galicia e o Colexio de Traballo Social, e que se desenvolverá a través dunha microweb, con historias inspiradas en postais, nun momento onde a pandemia obriga a gardar as distancias sociais. Un traballo de concienciación en redes, que inciden na idea “Contra a cultura da violencia, a cultura do coidado”.

Unha cinta negra

A gravacion dunha video-performance, na que participa a artista Mónica Mura, para rodear, de forma simbólica, a cidade cunha cinta negra; no que segundo explicou Uqui Permuy, é “unha campaña de loito contra as violencias machistas” A cinta, de medio metro de ancho por 30 de longo, irá rodeando, simbólicamente, as casas da cidade vella, a zona nova e os barrios.

A visión dos homes

A difusión, en diferentes espazos da cidade e nos Centros Socioculturais do rural, dunha peza audiovisual que se está realizando e na que diferentes homes plantexan a súa visión das violencias. Cruz Dafonte explicaba que lle impactou o que se di nun dos videos, de que “xa non vale ir pasiño a pasiño, hai que dar brincos, porque o cambio cara a corresponsabilidade e cara o reparto dos coidados ten que vir dunha reflexión interna por parte dos homes”. Esta gravación difundirase tamén a través das redes sociais.

A maiores está previsto ler un manifesto, o mesmo 25 de novembro, entre todos os grupos da corporación municipal.

Datos que estremecen

Mercedes Rosón referiuse aos datos estatísticos publicados polo Observatorio contra a Violencia Doméstica e de Xénero do Consello Xeral do Poder Xudicial; sinalando que “durante o primeiro semestre de 2020, as denuncias por violencia machista reducironse. Pero isto foi só un espellismo. Porque a partir de xuño, co desconfinamento, os profesionais que traballan con mulleres en situación de violencia de xénero perciben un aumento das demandas de atención por parte das vítimas, o que conleva, paralelamente, un aumento das denuncias por violencia machista”. A concelleira explicou que o confinamento “simplemente agochou e agravou a realidade e a vida das mulleres que sofren violencia machista. O descenso desas denuncias e solicitudes de atención especializada por situacións de malos tratos físicos ou psicolóxicos debeuse a que estaban baixo a ameaza constante dos seus agresores. Unha situación, na que debemos estar vixiantes, porque se pode recrudecer de novo nesta segunda vaga”, engadiu.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial