O Pino, 20 de marzo do 2019 – O Psoe de O Pino solicita a anulación dun proceso selectivo para unha praza de traballador social comezado hai dous anos e que publica agora as listas de admitidos.
O pasado venres, día 15 de marzo, o Boletín Oficial da Provincia de A Coruña publicaba as listas definitivas de admitidos/as para o proceso selectivo dunha praza de traballador/a social, vacante no cadro de persoal laboral fixo do Concello de O Pino dende fai máis de dous anos. Trátase dun procedemento iniciado en marzo de 2017, e que en maio, do mesmo ano, seguía o seu trámite coñecéndose a lista provisional de admitidos/as, e logo despois se mantiña en suspenso, descoñecendo as causas, ata o pasado venres, 15 de marzo, cando se publican as listas definitivas.
O voceiro socialista, Óscar Vilar, critica este retraso e solicita a anulación “o proceso de selección estivo parado durante dous anos e reactívase á présa e correndo, vistas as formas e o apuro en convocar o tribunal cualificador”. Consideran que a resolución da alcaldía é extemporánea, e nula de pleno dereito “falamos dunha vacante no cadro de persoal laboral fixo do Concello de O Pino que data do ano 2017, segue vacante no ano 2019, e pretenden que só poidan optar a mesma os interesados no 2017. Permitir isto, é ir en contra do principio de igualdade de trato no acceso ao emprego público, o cal, está garantido na Lei do Estatuto Básico do Empregado Público”, sostén Vilar.
Solicitan a suspensión do proceso, e abrir un novo procedemento
Os socialistas non se limitan á denuncia e anuncian a interposición dun Recurso Potestativo de Reposición contra o acto ditado polo alcalde, Manuel Taboada. Indican que, “o correcto sería abrir un novo procedemento e que todo aquel/a que cumpra cos requisitos poida optar a praza, pode darse o caso que, persoas interesadas, no ano 2017, non reuniran requisitos, tipo; titulación académica, e agora, dous anos máis tarde, coa vacante aínda libre, que si os cumpran” apuntan.
