Rois aproba un orzamento de 3,7 millóns no 2021

0

Rois, 11 de febreiro do 2021 – O pleno municipal de Rois aprobou o orzamento do concello que chega aos 3,7 millóns de euros.

O orzamento foi aprobado con 7 votos a favor do equipo de goberno (PP) e a abstención da oposición (PSdeG e BNG).

Menos obras e máis gasto social

Nas contas increméntanse o gasto social e as axudas ás familias e redúcese o investimento en obras. A partida de gastos en bens correntes e servizos que se prestan a veciñanza representan 1,88 millóns, e as inversión reais 390.000. Durante o presente exercicio, o Concello de Rois recibirá a maior parte dos ingresos das transferencias procedentes doutras administración (1,96 millóns), mentres que os impostos e taxas supoñen algo máis do 42% dos ingresos (1,6 millóns de euros).

Con respecto ao ano pasado, aumenta o capítulo de gastos en bens correntes e servizos debido ao incremento das partidas destinadas ao programa que se vai poñer en marcha para fomentar a conciliación familiar e laboral entre os escolares do municipio, e tamén a un maior gasto nos servizos de limpeza e desinfección dos colexios por mor da covid-19.

Os 238.600 euros do capítulo de transferencias correntes destinaranse a pagar a atención benéfico-asistencial á veciñanza, os programas de becas, cultura e deportes, ademais da escola infantil de Rois e o centro de día de Urdilde. A maior parte do plan POS+ Adicional da Deputación servirá para axudas ás familias e reservase unha partida de fondos propios do Concello para subvencións aos empresarios e autónomos que non recibiron axudas do PEL Reactiva da Deputación.

O montante destinado a obras (inversión reais) redúcese este ano respecto a 2020 para dotar con máis fondos ás partidas destinadas a gasto social e a axudas ás familias.

Preguntas da oposición

No debate, tanto BNG como PSdeG preguntaron pola municipalización do Servizo de Axuda no Fogar (SAF) e se está dotada suficientemente esta partida. Na resposta, dende intervención adiantouse que a previsión é que a empresa que colabora co concello siga facturando durante os primeiros catro meses do ano, e que a partir de maio, as traballadoras da empresa que prestan servizo en Rois se incorporen ao cadro de persoal municipal.

A oposición tamén se interesou pola adquisición de dúas fincas, unha delas no entorno do colexio dos Dices. O alcalde explicou que é para intentar trasladar a esta zona a escola infantil A Galiña Azul e poder ampliar as prazas coa que conta agora mesmo, que son insuficientes para atender a demanda. “A nosa intención é poder concentrar tanto a escola infantil coma o colexio na mesma zona”, explicou o alcalde, Ramón Tojo. Tamén está previsto comprar outra finca preto da igrexa de Seira para ampliar espazo municipal nesa zona.

Na sesión tamén se aprobou a conta xeral de 2019, cos votos a favor de PP e BNG e a abstención do PSdeG.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial