Un Festival visibilizará a enfermidade de Dent este sábado en Brión

0

Brión, 15 de outubro do 2021 – Nace en Brión o I festival solidario Fest for Dent, un programa de actividades co obxectivo de visibilizar a enfermidade de Dent.

Música Miúda, Ruth Gundíns, V-Roc, Gate 3, Zona Vella, a Escola de Pandeireta e a Banda de Música de Brión serán os protagonistas de Fest for Dent. O lugar a Carballeira de Santa Minia en Brión de catro a oito da tarde.

O recadado das entradas, xa á venda por 3 euros en establecementos da localidade, empregarase en axudar a financiar a investigación da enfermidade de Dent, unha doenza xenética minoritaria. En caso de choiva, o festival trasladarase ao Pavillón Municipal.

O menú musical do Fest for Dent contará coa banda infantil de pop-rock en galego Música Miúda, coa gañadora dos Recantos de Ouro do Luar da TVG Ruth Cundíns, co grupo de pandeireteiras da escola de música e baile tradicional de Brión e mais coa Banda Municipal da localidade. Tamén haberá oco para os grandes temas do pop, do rock e do blues da man dos veteranos composteláns Zona Vella e mais dos locais V-roc e Gate 3.

A enfermidade de Dent é unha doenza xenética que afecta gravemente ás funcións habituais dos riles, impedindo que o organismo asimile elementos básicos para a vida como proteínas, vitaminas, potasio, magnesio ou calcio.

A día de hoxe, esta doenza non ten cura nin tratamento, pero o Hospital Clínico de Santiago de Compostela e mais o Vall d´Hebrón, en Barcelona, están desenvolvendo investigacións que poderían mellorar ou solucionar este problema no futuro.

Co obxectivo de axudar a financiar estas investigacións, naceu en maio de 2021 a asociación Art for Dent, que está formada por un grupo de familias galegas con nenos afectados por esta enfermidade minoritaria.

Para conseguilo, a asociación Art for Dent leva a cabo diferentes actividades: recollida solidaria de tapóns, venda de merchandising, exposicións artísticas, murais solidarios e, agora, o Fest for Dent, que organizan en Brión man a man con Kratos Restaurante, Gate 3 e Culturactiva.

Contan tamén coa colaboración das bandas e grupos participantes e do Concello de Brión e co patrocinio de ducias de establecementos comerciais da localidade: as farmacias de Brión, a adega Santa Minia, Brincan, Mesón Abelleira, Panadería La Canela, Mesquiteira, Brión Motor, Novo Faro, mesón O’Adro, J&L Peluqueros, Limpiezas Batalla, Pastelón do camiño, Café Bar “Áncora”, estancos “Os Ánxeles” e “A Senra”, Peitéate Peluquería, Estanco Bastabales, centro de negocios Brión, Policlínica Os Ánxeles, Emesar, Terras de Labranza, Bar A Pedra, Taller SafeStop, Asociación Cultural e de Veciñ@s O Tremo, Novoneón Rótulos e PolboPrint.

A entrada ao Fest for Dent será libre para as e os menores de idade, mentres que as persoas adultas deberán comprar unha entrada solidaria de 3 euros que xa está á venda no Kratos Restaurante, na papelería Orballo e no estanco Os Ánxeles. Tamén hai fila 0, para quen queira colaborar aínda que non poida asistir ao festival, á venda no Kratos Restaurante.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial