VIII Noia Harp Fest, único certame de arpa do noroeste ibérico

0

Noia, 15 de xullo do 2021 – Este mércores foi presentada a oitava edición do Noia Harp Fest, o único certame de arpa do noroeste da península.

Do catro ao seis de agosto o Noia Harp Festa collerá artistas de Italia, Bretaña, Lituania, Francia, Paraguay, Galicia, Euskadi, Cataluña e

Andalucía. É un dos poucos eventos que se seguiu celebrando en pandemia e esta será a segunda edición marcada polas restricións.

O encontro de arpa foi presentado polo seu director, Rodrigo Romaní, e o concelleiro de cultura de Noia, José Pérez Martínez. Romaní destacaba a pluralidade estilística do festival, que da lugar a “unha proposta exquisita na que tamén se descobren rarezas de calidade”.

Espazos e estilos

Estilos como a música clásica, as creacións populares europeas e latinoamericanas, a vangarda contemporánea, o folk ou, por primeira vez, o flamenco, formarán parte do festival.

O Noia Harp Fest incorpora este ano un novo escenario a ceo aberto, os xardíns da Central Hidroeléctrica do Tambre, que se suma ao habitual da Praza do Tapal; mentres que Santa María A Nova acollerá os obradoiros de arpa.

A intención ao incorporar a Central é afondar na estreita relación entre o patrimonio musical e arquitectónico que o certame pretende poñer en valor desde a primeira edición, ao tempo que celebra e visualiza os monumentos do territorio no que se desenvolve.

É o caso dos xardíns da Central Hidroléctrica do Tambre, nos que se atopa o edificio modernista deseñado polo recoñecido arquitecto Antonio Palacios (autor de obras como o Palacio de las Telecomunicaciones de Madrid ou Círculo de Bellas Artes da mesma cidade). Ao abeiro deste monumento da arquitectura industrial, celebraranse os concertos acústicos en horario de tarde, sempre e cando as condicións meteorolóxicas así o permitan.

Artistas

A arpa constitúe o eixe vertebrador dun festival cuxo cartel inclúe arpistas e intérpretes de sona, como a italiana Marianne Gubri, o bretón Tristan le Govic, en formato trío, a andaluza Ana Crisman ou mesmo agrupacións como a vasca Basabi, formación con interese na difusión da txalaparta e da que forma parte a coñecida arpista Alicia Griffith; ou o tándem conformado polos arpistas Davide Burani e José Antonio Domene.

 

Outro dúo, Formiga e Cigale, desta quenda francés e catalán, explora a música folk a través da arpa celta e do violín; mentres que o trío Ysando fusiona a tradición musical paraguaia e latinoamericana con composicións propias.

 

Con todo, nesta edición do Noia Harp Fest, tamén estarán presentes,

como é habitual, os músicos galegos. É o caso de Pedro Lamas. O creador e compositor acompañará a Aiste Bruzaite nun concerto de kanklès, un singular instrumento de corda popular lituano moi popular neste país e na súa contorna.

Obradoiros de arpa

Outra das novidades respecto da pasada edición é que Noia Harp Fest retomará neste 2021 algunha das súas actividades paralelas habituais. É o caso dos obradoiros impartidos polos participantes do festival, que ofrecerán clases maxistrais ao alumnado deste instrumento en Santa María A Nova. Serán tres sesións diferentes, nas mañás dos días de celebración do festival, nas que Marianne Gubri (mércores 4), Aiste Bruzaite (xoves 5) e Ana Crisman (venres 6) compartirán todo o seu coñecemento e experiencia con novos instrumentistas galegos.

O prazo de solicitude para participar nestes obradoiros ábrese este mesmo mércores, 14 de xullo. Toda a información sobre estes talleres e o proceso de inscrición está dispoñible na páxina web do certame, www.noiaharpfest.gal, na que o público tamén pode consultar tanto os datos da programación como a información pertinente para proceder á reserva de entradas.

Reserva de entradas

Os concertos do Noia Harp Fest son de acceso gratuíto, se ben cómpre facer unha reserva previa para poder asistir a través de convite. En atención á normativa sanitaria vixente de prevención da covid-19, e coa intención poder garantir a súa entrada para cada concerto, as persoas interesadas en asistir a algunha das citas do certame, deberán remitir, con antelación, un correo electrónico á dirección programacionconcellodenoia@gmail.com, indicando o seu

nome e apelido, DNI, teléfono de contacto, concerto ao que quere ir -indicando o día ou días que quere asistir, así como a hora ou horas das actuacións- e número de persoas que asistirán a cada actuación -no caso dos concertos de tarde, será un máximo de 2 persoas, mentres que os nocturnos será posible reservar ata 4 prazas.

O Concello de Noia confirmará os convites a través do mesmo método e requerirá os datos que sexan precisos para a súa formalización.

Para máis información sobre VIII Noia Harp Fest, ou calquera novidade sobre o festival, o público pode visitar a páxina web oficial www.noiaharpfest.gal ou os perfís que o certame posúe

nas canles Instagram, Twitter, Facebook e Youtube.

Share.

Comments are closed.

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies, pinche el enlace para mayor información.plugin cookies

ACEPTAR
Aviso de cookies
Social media & sharing icons powered by UltimatelySocial